Bahan Ajar Berdialog Bahasa Jawa

 

Panglantar

            Puji syukur konjuk ing  ngarsa  Gusti Kang Maha Agung, awit kanthi rahmat-E Materi Guneman Nganggo Basa Jawa iki bisa dirampungake. Materi iki karakit lelandhesan materi-materi sing wis ana utawa sing wis ditulis ing buku-buku pasinoan basa Jawa. Mung wae ing materi iki bab-bab sing durung tumata ditata, sing durung ganep diganepi.

            Materi iki katulis kanthi tujuan supaya para siswa entuk wawasan kang bener lan ganep bab guneman nganggo basa Jawa.

            Ing materi pasinaon iki, materi ditulis lan ditata urut saka Kompetensi Dasar kang digayuh, tujuan-tujuan pasinaon, lan kawruh omong-omongan saka sing gampang tumuju kang saya angel.

            Kanggo nggampangake anggone padha latihan omong, sabubare diandharake materi pasinaon banjur dicawisake sarana latihan kang dikantheni katrangan  kontekstual. Bab iku duwe tujuan supaya apa sing kudu dilakoni siswa iku cetha.

            Panulis ngakoni menawa isih akeh bab-bab sing kurang ing materi pasinoan iki, mula saka iku panulis ngantu-antu iguh pratikel saka para pamaos kanggo gawe apik lan ganepe  materi pasinaon iki. Nuwun

                                                                                                Panulis

PITUDUH PANGANGGONE MATERI PASINAON

 

1.     Paringana apersepsi marang siswa menawa guneman nganggo basa Jawa bisa kanggo nglatih karakter

2.     Panjenengan pilih materi kang jumbuh karo tataran klas

3.     Kaandharna kanthi tliti, runtut saka kang  gampang tumuju kang angel  ing bab kawruh apadene praktek guneman.

4.     Paringana  gambaran lan  conto nyata jroning guneman

5.      Mantepna maneh kawruh babagan guneman marang siswa

 

1.     Kawruhana bab-bab kang ana gandhenge karo guneman

2.     Suwunna pirsa marang guru bab sing durung kokngerteni

3.     Ajara kendel kanggo guneman

4.     Takokna marang awakmu dhewe bab-bab kang durung kongerteni bab kang ana gandhenge karo guneman

5.       

DAFTAR ISI

                                                                                                                                           Kaca

JUDHUL         .......................................................................................................................... i

PANGLANTAR .....................................................................................................................  ii

PITUDUH PANGANGGONE MATERI PASINOA ..............................................................iii

DAFTAR ISI ..........................................................................................................................  iv

STANDAR KOMPETENSI....................................................................................................... 1

KOMPETENSI DASAR............................................................................................................ 1

MATERI PASINAON ...........................................................................................................  1

1.      RAGAM BASA JAWA ....................................................................................................1

2.      TEMBUNG PANANDHA BASA ....................................................................................2

a.       Tembung Ngoko........................................................................................................... 3

b.      Tembung Madya ......................................................................................................... 3

c.       Tembung Krama............................................................................................................3

d.      Tembung Krama Inggil ................................................................................................3

e.       Tembung Krama Andhap .............................................................................................4

f.        Tembung Netral.............................................................................................................4

3.      PANGANGGONE BASA ................................................................................................4

a.       Basa Ngoko Lugu..........................................................................................................4

b.      Basa Ngoko Alus......................................................................................................... 5

c.       Basa Krama Lugu........................................................................................................ 6

d.      Basa Krama Alus......................................................................................................... 7

4.      DAFTAR SAWETARA TEMBUNG NETRAL – NGOKO – KRAMA - KRAMA INGGIL ........................................................................................................................... 8

5.      LATIHAN ....................................................................................................................... 11

6.      RINGKESAN .. .......... ..................................................................................................  11

UJI KOMPETENSI ................................................................................................................ 12

GLOSARIUM ......................................................................................................................... 14

DAFTAR PUSTAKA ............................................................................................................... 15

STANDAR KOMPETENSI:

Mampu mengungkapkan pikiran, pendapat, gagasan, dan perasaan secara lisan melalui berbicara, bertelepon, dan berdialog dalam berbagai ragam bahasa Jawa sesuai unggah-ungguh.

 

           

 

1.      Siswa dapat menyebutkan ragam bahasa Jawa

2.      Siswa dapat menyebutkan penanda ragam bahasa

3.       Siswa dapat berdialog dengan  orang yang statusnya sama dan akrab dengan bahasa Jawa yang tepat.

4.       Siswa dapat berdialog dengan orang yang statusnya sama dan akrab tetapi masih membutuhkan penghormatan.

5.       Siswa dapat  berdialog dengan orang  tua yang  hubungannya akrab.

6.       Siswa dapat berdialog dengan  orang yang kedudukannya lebih rendah kepada yang lebih tinggi atau sebaliknya.

7.       Siswa dapat berdialog dengan orang  yang lebih tua yang hubungannya kurang akrab dengan bahasa yang tepat.

8.       Siswa dapat berdialog dengan  orang yang tua kepada yang muda tetapi status yang tua lebih rendah dengan bahasa Jawa yang tepat.

9.       Siswa dapat memperagakan dialog sesuai dengan teks  yang tersedia.

.

MATERI PASINAON

1.      Ragam Basa Jawa

Basa Jawa iku  ora mung siji. Sacara baku  basa Jawa dibedakake dadi loro, ngoko lan krama. Basa ngoko dibedakake maneh dadi ngoko lugu, lan ngoko alus. Dene basa Jawa krama dibedakake dadi  krama lugu lan krama alus.

            Ing dhuwur dikandhakake menawa basa Jawa sacara baku ana loro. Apa ana sing ora baku?  Sejatine ing bebrayan basa Jawa sing ditemokake ya mung ngoko lan krama iku. Nanging  ngoko lan krama kuwi ora mung lugu lan alus, sebab ana ngoko kasar lan krama madya. Mung wae ing sekolah sing diwulangake  mung ngoko lugu, ngoko alus lan krama lugu lan krama alus.

            Pamilahing basa Jawa bisa dideleng  ing tabel ngisor iki.

Katrangan:

Ngoko kasar lan krama madya ora diwulangake ing sekolah nanging isih digunakake ing masyarakat.

2.      TEMBUNG PANANDHA BASA

Basa-basa ing basa Jawa kasebut dadi beda-beda jenenge iku amarga basa-basa kasebut duwe  titikan dhewe-dhewe. Titikan-titikan mau awujud tembung sing  digunakake ing  basa kasebut. Mula banjur diarani tembung panandha basa. Yen tembung-tembung sing dadi  panandha iku mau ora pener mapane,  basa mau dadi ora laras karo jenenge utawa dadi ora bener.

Tembung sing dadi panandha basa kasebut yaiku tembung  ngoko, tembung madya,  tembung krama, lan  tembung krama inggil,  tembung netral.  Supaya luwih cetha gatekna ing tabel ngisor iki.

No	Basa	Tembung panandha
1	Ngoko kasar	ngoko lan netral
2	Ngoko lugu	ngoko lan netral
3	Ngoko alus	ngoko, krama/krama inggil/krama andhap, lan netral
4	Krama lugu	krama lan netral
5	Krama madya	ngoko, krama/krama inggil, lan  netral
6	Krama alus	krama, krama inggil/krama madya, lan netral

Kanggo ngerteni maksud saka siji-sijine panandha tembung kasebut bisa digatekakake ing katrangan ngisor iki.

a.      Tembung Ngoko

Tembung ngoko iku tembung sing duwe imbangan tembung krama, tembung madya, tembung krama inggil,   tembung krama madya, utawa tembung krama-krama inggil.  Conto tembung ngoko bisa dideleng ing tabel ngisor iki.

No	Tembung Ngoko	Pasangan Tembung
		Madya	Krama	Krama Inggil	Krama Andhap
1	arep/meh	ajeng	badhe	-	-
2	banyu	-	toya	-	-
3	turu	-	tilem	sare	-
4	weteng	-	-	padharan	-
5	ngundang	-	-	nimbali	ngaturi

b.      Tembung Madya

Tembung madya iku tembung krama sing  aluse sangisore krama sandhuwure ngoko.  Conto-conto tembung madya bisa dideleng ing tabel ngisor iki.

No	Tembung Ngoko	Tembung Madya	Tembung Krama
1	uwis	empun	sampun
2	ana	onten	wonten
3	arep	ajeng	badhe
4	kowe	ndika	panjenengan
5	menyang	teng	dhateng

c.       Tembung Krama

Tembung krama iku wujud alus saka tembung krama. Ana sing ngarani tembung krama iku tembung urmat ing unggah-ungguh. Tembung krama mesthi nduweni imbangan tembung ngoko. Cacahe tembung krama iku akeh. Tabel ing ngisor iki saperangan conto tembung krama.

No	Tembung Ngoko	Tembung Krama
1	bali	wangsul
2	percaya	pitados
3	tau	nate
4	esuk	enjing
5	jeneng	nama

d.      Tembung Krama Inggil

Tembung krama inggil sing  digunakake kanggo ngurmati wong sing diajak guneman. Kanggo ngurmati sing diajak guneman, sing diajak guneman  “didhuwurake” nganggo tembung krama inggil. Mula saka iku tembung krama inggil mung ditrapake ing wong sing diajak omongan lan sing  diomongake. Tembung krama inggil ana sing mung duwe imbangan tembung krama lan ngoko lan ana sing mung duwe imbangan tembung ngoko. Contone kaya ing tabel ngisor iki.

No	Tembung Krama Inggil	Tembung Krama	Tembung Ngoko
1	dalem	griya	omah
2	dhahar	nedha	mangan
3	rawuh	dugi	teka
4	kondur	mantuk	mulih
5	asta	-	tangan

e.      Tembung Krama Andhap

Tembung krama andhap iku tembung sing digunakake kanggo ngurmati wong sing diajak omongan kanthi cara ndhuwurake wong sing diajak omongan lan ngasorake awake dhewe. Dadi tembung krama andhap iku mung kanggo awake dhewe. Tembung krama andhap iki cacahe mung sithik.

No	Tembung Krama Andhap	Tembung Krama inggil	Tembung Ngoko
1	sowan	rawuh	teka
2	nyuwun	ngersakaken	njaluk
3	matur	ngendika	ngomong
4	ndherek	ngrawuhi	ikut
5	ngaturi	nimbali	ngundang

f.        Tembung Netral

Tembung netral iku tembung sing ora duwe imbangan tembung liyane. Tembung iki ora nelakake kasar apa alus. Dadi tembung iki bisa digunakake dening sing omong, sing diajak omong, lan sing diomongake. Delengen tabel ing ngisor iki.

No	Tembung Netral	Tembung Ngoko	Tembung Madya	Tembung Krama	Tembung Krama Inggil	Tembung Krama Andhap
1	cendhela	-	-	-	-	-
2	sapu	-	-	-	-	-
3	radhio	-	-	-	-	-
4	kates	-	-	-	-	-
5	pelem	-	-	-	-	-

3.      Panganggone Basa        

Carane milih basa Jawa sing endi sing arep digunakake iku ana  bab sing kanggo tetimbangan utawa dhasar. Dhasare yaiku faktor sosial.  Sing dikarepake faktor sosial yaiku bab-bab sing sesambungan karo jenis kelamin, umur, sesambungan kulawarga, kalungguhan, pendidikan, pametu, papan, lan akrab orane. Faktor sosial sing kanggo dhasar pamilihing basa Jawa yaiku umur, kalungguhan, lan kaakraban (raket lan ora sesambungane). Basa sing endi sing arep digunakake nalika guneman karo wong liya kudu nggatekake umur, kalungguhan, lan raket lan orane sing guneman lan sing diajak guneman. Cak-cakan siji lan sijine kaya kasebut ing ngisor iki.

a.      Basa Ngoko Lugu

Basa ngoko lugu digunakake nalika omong-omongan  antarane:

1)      Wong kapisan  lan wong kapindho  kang raket banget, ora perlu ngalusake basa siji lan sijine.

Conto:

Konteks

Budi lan Amir iku kanca sekolah lan sakelas ing SMP. Wektu iku lagi ngaso. Dheweke omong-omongan neng ngarep kantin. Sing diomongke  ora liya  jajanan sing dituku neng kantin. Amarga wis akrab banget, siji lan sijine nalika ngomong ora ana tembung sing digawe alus.

Budi : “Dengaren tuku mendhowan, Mir. Jare ra entuk mangan gorengan.”

Amir : “Pisan-pisan ya ra papa ta, Bud. Gelem pa taktukoke?”

Budi : “Ora ah. Aku wis entek sega kucing loro, kok. Aku njaluk ese wae.”

Amir : “Ya wis kana njupuka, mengko takbayare.”

2)      Digunakake dening wong kapisan kang kalungguhane luwih dhuwur (wong tuwa, guru, bendara)  marang wong kapindho kang kalungguhane luwih cendhek (anak, murid, rewang).

Conto :

Konteks:

Ing  dina Minggu esuk, Budi arep ngetokake pit montore saka ngomah. Nalika Budi mbukak lawang, bapakne wis ana ngarepan omah. Mesthi wae Budi didangu bapakne.

Omong-omongane:

Bapak : “Arep nyang ndi, Bud?”

Budi    : “Dhateng griyanipun  kanca, Pak?”

Bapak : “Ana acara apa ta?”

Budi    : “Ngampil LKS, Pak.”

Bapak : “Ya wis. Aja suwe-suwe!”

Budi    : “Nggih, Pak.”

b.      Basa Ngoko Alus

 Basa ngoko alus iku digunakake dening:

1)      Wong sing sesambungane akrab ning salah siji apa loro-lorone kepengin padha ngajeni.

Conto

Konteks:

Nalika ngaso, Bu Sinta,  guru Fisika ing SMP Z  lan  Bu Wati, guru Basa Jawa, ketemu  ruwang guru.  Guru loro iku banjur  jagongan. Sing  dirembug nalika jagongan iku ora liya bab tes unggah-unggahan. Priyayi loro kasebut sesambungane akrab nanging isih padha dene ngajeni.

            Bu Sinta : “Panjenengan wis wiwit ngolah biji, Pak?”

            Bu Wati : “Lagi ngrata-rata biji ulangan harian. Lha Njenengan?”

            Bu Sinta : “Aku wis rampung. Mung kari nunggu biji UKK mengko.”

            Bu Wati : “Kok cepet temen, njenengan?”

            Bu Sinta  : “Lha, bubar Kepala Sekolah kae ngendika, aku langsung nggarap.”

            Bu Wati : “Wah nek ngono mengko awan takrampungne.”

           

2)      Gunemane wong kapisan lan wong kapindho sing wis akrab, nanging sing diomongake (wong katelu) iku  sing kalungguhan lan umure luwih dhuwur dadi perlu diurmati.

Conto

Konteks:

Pandu lan Jaka  sadurunge mulih sinambi  nunggu pethukan omong-omongan neng cedhak gapura sekolah. Sing diomongke bab PR Basa Inggris.

Pandu   : “Ka, kowe wis mudheng PR sing diparingke Pak Edi mau?”

Jaka     : “Sithik-sithik wis. Lha napa?”

Pandu   : “Aku nek Inggris blas ra isa je.”

Jaka    : “Ngene wae, mengko nyuwun warah ibu apa bapakmu.”

Pandu   : “Bapak lan Ibuku tindak ki.”

Jaka     : “Mmm, mengko nek aku wis rampung  kowe tak-SMS, takajari. Piye?”

Pandu   : “Siip ,nek ngono.”

c.       Krama Lugu

Basa Jawa krama lugu iku digunakake ing omong-omongane:

1)      W1 marang W2 sing statuse kurang luwih padha, wis kulina, padha dene ngajeni, nanging ora urmat banget.

Conto

Konteks:

Pak Teja karo Pak Marna iku padha-padha guru sing wis suwe ora ketemu. Kebeneran ing sawijining wektu  ketemu ing papan wisata. Ing kono sing diobrolake ora bab piknik ning malah ngobrol ngalor ngidul bab  rega BBM. Najan wis akrab nanging isih tetep ngajeni.

Pak Teja    : “ Sampeyan sampun mireng menawi BBM badhe mindhak, Pak?”

Pak Marna : “ Inggih  namung mireng saking TV. Lha dospundi”

Pak Teja     : “Kadospundi nggih, estunipun awrat kangge kula.”

Pak Marna : “Sami kemawon. Kula inggih awrat. Nanging menawi tetep

                       dipunindhakaken, sampeyan lan kula rak nggih namung manut ta?”

Pak Teja    : “Inggih ta nggih, lha menawi badhe kesah-kesah napa motor namung

    dipunsurung?”

                  Pak Marna : “Nggih dipuntengga kemawon mangke keputusanipun kados pundi.”

                  Pak Teja    : “Lha  inggih ta.”

2)      Wong kapisan marang Wong kapindho sing ngomongake bab saliyane manungsa nganggo basa krama.

Conto

Konteks:

Pak Warna iku sawijining  tani. Kira-kira jam 10, Pak Warna kondur ngasta sawi. Ing tengah dalan ketemu karo  Pak Bambang.  Lelorone banjur nyritakake bab tanduran sawine.

Pak Warna             : “Menika lho Pak Bambang, sawi kula pethiki, mangka dereng

    wancinipun panen.”

Pak Bambang         : “Lho, lha kenging menapa?”

Pak Warna             : “Kalih dinten kepengker kula rabuki ngangge urea. Lha kok

   wau enjing kula tingali malah kathah ingkang pejah. Mangka

   kula sampun tliti lho ngrumatipun, nanging kok nggih tetep

   pejah. Dados kula nggih dereng ngertos sebabipun. Menawi   

   Pak  Bambang purun ta,  mendhet ing sabin kula.”

                   Pak Bambang        : “Nggih matur nuwun.”

d.      Krama Alus

 Basa krama alus iku digunakake nalika omong-omongan antarane:

1)       Bocah enom marang wong tuwa (murid marang guru utawa anak marang wong tuwa)

Conto

Konteks:

Ing wayah bubaran sekolah, Umi, murid kelas 8 nyuwun pirsa marang Pak  Edi, guru Matematika bab PR.

Umi                : “Pak, badhe nyuwun pirsa.”

Pak Edi          : “Bab apa?”

Umi                : “PR kalawau menika lho, Pak.”

Pak Edi          : “Lho rak wis cetha ta?”

Umi                            : “Inggih sampun. Namung nggarapipun kedah dipuntik menapa cekap       

    dipunserat tangan?”

Pak Edi          : “Nek pengin apik ya ditik, ning ditulis tangan ya ra papa.”

Umi                : “Matur nuwun, Pak.”

Pak Edi          : “Ya, padha-padha.”

            Konteks:

Bubar Maghrib, Arif matur marang Bapak lan Ibune  anggone didhawuhi nyiyapake piranti kanggo kemah.

Arif          : “Pak, minggu ngajeng tanggal 23 Juni sekolah badhe ngawontenaken

    kemah. Kula kadhawuhan pados ampilan tendha. Kadospundi

    menika,   Pak?”

Bapak      : “Biyasane sing duwe tendha kuwi rak ya sekolahan ta? Lha kira-kira   

     sekolah ngendi sing duwe?”

 Arif          : “Sekolahanipun Ibu kagungan boten, Bu?”

 Ibu           : “Coba sesuk taksuwunke pirsa Ibu Kepala Sekolah.”

 Arif          : “Sampun ngantos kesupen lho, Bu.”

 Bapak      : “Sesuk ben ra lali ibumu taksms-e.”

 Arif          : “Inggih, Pak, matur nuwun.”

2)      Wong  sing durung padha kenal.

Conto

Konteks:

Pak Darsana lan Pak Mustofa iku umur-umurane imbang, nanging ora akrab amarga pancen durung kenal. Ing sawijining dina Pak Darsana nggoleki daleme Pak Marlam sing daleme cedhak Pak Mustofa. Tekan kampunge Pak Marlam, Pak Darsana  ketemu Pak Mustofa, mula banjur nyuwun pirsa  marang Pak Mustofa.

Pak Darsana  : “Nuwun sewu Pak, badhe nyuwun pirsa.”

Pak Mustofa  : “O inggih.”

Pak Darsana  : “Dalemipun Pak Marlam menika ingkang pundi nggih?”

Pak Mustofa  : “Pak Marlam? Pak Marlam ingkang dados guru SMP?”

Pak Darsana  : “Inggih, leres.”

Pak Mustofa  : “O...menika panjenengan lajeng kemawon, mangke wonten

    prasekawan  katuran nengen. Kirang  langkung seket meter wonten  

    pratigan, mangke   panjenengan menggok ngiwa. Dalemipun Pak

    Marlam  celak mesjid.”

               Pak Darsana  : “Matur nuwun sanget, Pak.”

               Pak Mustofa  : “Inggih, sami-sami.”

3)      Wong sing statuse cendhek marang sing statuse luwih dhuwur (bawahan marang atasan, warga marang tokoh masyarakat)

Conto

Konteks:

Pak Winarta, guru IPS ing SMP A , ing sawijining wektu matur marang Kepala Sekolah bab murid-murid sing padha nglanggar aturan.

Pak Winarta               : “Bu, menika kados pundi, saben dinten kok wonten

    kemawon lare    ingkang nerak pranatan?”

Kepala Sekolah          : “Ngene  wae, njenengan bukak maneh buku tata tertib. Terus

   sing  nglanggar kuwi mau sanksi apa? Bali neng aturan wae,   

   Pak. Awake dhewe kudu tegas.”

             Pak Winarta                : “Menapa boten langkung sae ngaturi tiyang sepuhipun

     kemawon.”

Kepala Sekolah           : “Kuwi iya, ning aturane dijejege dhisik. Nek wis ora mandi ya     

    lagi ngaturi wong tuwa murid.”

            Pak Winarto                 : “O... inggih sampun menawi mekaten. Pareng.”

            Kepala Sekolah            : “Mangga-mangga.”

4.      Tembung Krama Inggil ing Basa Ngoko Alus lan Krama Alus

Kaya kasebut ing dhuwur yen ing basa ngoko alus lan krama alus iku ing panandhane ana tembung krama inggil. Tembung krama inggil kang dadi tandha ing basa kasebut iku diatur kaya ing ngisor iki.

a)      Tembung krama inggil ditrapake ing tembung panyapa kanggo wong kapindho lan wong katelu kang perlu “diduwurake”.

Conto:

Tembung kowe  lan dheweke dadi panjenengan lan panjenengane ing basa ngoko alus, panjenengan lan panjenenganipun ing krama alus.

b)      Tembung krama inggil ditrapake ing tembung kriya kang ngokone duwe pasangan krama inggil, kanggo wong kapisan lan wong kapindho kang perlu “didhuwurke”.

Conto:

Tembung Ngoko	Tembung Krama Inggil
mangan	dhahar
lunga	tindak
adus	siram
turu	sare
tangi	wungu
ngomong	ngendika
nggawa	ngasta
tuku	mundhut
jupuk	pundhut
teka	rawuh

c)      Tembung krama inggil ditrapake ing tembung kaanan kang ngokone duwe pasangan krama inggil kanggo wong kapindho lan katelu kang perlu “didhuwurake”.

Conto tembung ngoko lara dadi gerah

d)      Tembung krama inggil ditrapake ing tembung aran kang ngokone duwe pasangan krama inggil kanggo wong kapindho lan wong katelu kang perlu “didhuwurake”

Conto:

Tembung aran ngoko	Tembung aran krama
rambut	rikma
endhas	mustaka
bathuk	palarapan
rai	pasuryan
mripat	paningal
kuping	talingan
gulu	jangga
cangkem	tutuk
tangan	asta
weteng	padharan
sikil	samparan
driji	racikan
omah	dalem
payung	songsong
idu	kecoh

e)      Tembung krama inggil ditrapake kanggo klitik wong kapindho lan katelu ing ngoko alus, klitik wong kapisan, kapindho, lan katelu ing basa krama alus.

Cethane klitik kok- , lan -mu  dadi panjenengan ing basa ngoko alus, dene klitik dak-, kok- , lan -mu  dadi dalem/kawula, panjenengan, lan panjenengan ing basa krama alus.

5.      Pangendhalining Tembung

            Kajaba bab-bab ing dhuwur, sacara sintaktik pamilihing tembung ngoko, krama, lan krama inggil dikendhaleni dening tembung utawa klitik sing mratelakake wong kapisan, kapindho, lan katelu.

            Tembung utawa klitik pangendhali pamilihing tembung ngoko, krama, lan krama inggil kaperang dadi 3 klompok, yaiku:

1.      klompok aku, kowe, dheweke, tak-/dak-, -ku, -mu.

2.      klompok kula, kawula, dalem, piyambakipun

3.      klompok panjenengan, slrane, keng slira, lan panjenenganipun.

Sing guneman arep nggunakake tembung ngoko, krama, apa krama inggil gumantung marang tembung-tembung pangendhali iku ing ukara. Upamane wiwitan ukara nganggo tembung aku mesthi wae sateruse dadi basa ngoko. Wiwitan ukara tembung kula mesthi wae basane dadi krama, lan sapiturute.

6.      Daftar  Sawetara Tembung Netral- Ngoko-Krama-Krama Inggil

No	Tembung Netral	Tembung Ngoko	Tembung Krama	Tembung Krama inggil
1	adat	-	-	-
2	adhil	-	-	-
3	adhuh	-	-	-
4	ahli	-	-	-
5	akal	-	-	-
6	akerat	-	-	-
7	alam	-	-	-
8	alamat	-	-	-
9	Allah	-	-	-
10	alon	-	-	-
11	ama	-	-	-
12	amben	-	-	-
13	amis	-	-	-
14	anteng	-	-	-
15	andhong	-	-	-
16	apem	-	-	-
17	asal	-	-	-
18	asin	-	-	-
19	atos	-	-	-
20	bablas	-	-	-
21	bahan	-	-	-
22	bayi	-	-	-
23	bakda	-	-	-
24	banting	-	-	-
25	barang	-	-	-
26	basa	-	-	-
27	bathi	-	-	-
28	bengkong	-	-	-
29	beres	-	-	-
30	belang	-	-	-
31	bibit	-	-	-
32	bisu	-	-	-
33	bledheg	-	-	-
34	bodho	-	-	-
35	boyok	-	-	-
36	bocor	-	-	-
37	cakar	-	-	-
38	campur	-	-	-
39	candhi	-	-	-
40	cap	-	-	-
41	dhawet	-	-	-
42	duren	-	-	-
43	kiwa	-	-	-
44	luwe	-	-	-
45	murid	-	-	-
46	najis	-	-	-
47	obor	-	-	-
48	pilek	-	-	-
49	rujak	-	-	-
50	soto	-	-	-
51	tani	-	-	-
52	upa	-	-	-
53	waras	-	-	-
54	wajib	-	-	-
55	-	adhi	-	rayi
56	-	adoh	tebih	-
57	-	adus	-	siram
58	-	aja	sampun	-
59	-	aku	kula	-
60	-	ala	awon	-
61	-	alis	-	imba
62	-	amarga	amargi	-
63	-	ana	wonten	-
64	-	anggo	angge	agem
65	-	apa	menapa	-
66	-	arang	awis	-
67	-	arep	badhe	-
68	-	ati	manah	penggalih
69	-	awak	badan	salira
70	-	awan	siyang	-
71	-	bapak	-	rama
72	-	bali	wangsul	-
73	-	bojo	semah	garwa
74	-	bubar	bibar	-
75	-	bengi	dalu	-
76	-	bener	leres	-
77	-	cangkem	lesan	tutuk
78	-	cedhak	celak	-
79	-	cilik	alit	-
80	-	cukup	cekap	-
81	-	dadi	dados	-
82	-	dawa	panjang	-
83	-	desa	dhusun	-
84	-	dhengkul	-	jengku
85	-	dhewe	piyambak	-
86	-	durung	dereng	-
87	-	dhuwit	arta	-
88	-	dhuwur	inggil	-
89	-	dina	dinten	-
90	-	dudu	sanes	-
91	-	duwe	gadhah	kagungan
92	-	elek	awon	-
93	-	eling	emut	-
94	-	endhog	tigan	-
95	-	esuk	enjing	-
96	-	endi	pundi	-
97	-	ewuh	ewed	-
98	-	gawe	damel	-
99	-	gedhe	ageng	-
100	-	guna	gina	-
101	-	idu	-	kecoh
102	-	iki	menika	-
103	-	iku	menika	-
104	-	ilat	-	lidhah
105	-	irung	-	grana
106	-	ireng	cemeng	-
107	-	ijen	piyambak	-
108	-	isih	taksih	-
109	-	isin	-	lingsem
110	-	jan-jane	sejatosipun	-
111	-	jeneng	nama	asma
112	-	kae	menika	-
113	-	karo	kaliyan	-
114	-	kira	kinten	-
115	-	kleru	klentu	-
116	-	kowe	sampeyan	panjenengan
117	-	kumpul	kempal	-
118	-	kurang	kirang	-
119	-	kuwi	menika	-
120	-	lagi	nembe/saweg	-
121	-	lali	supe	-
122	-	lanang	jaler	kakung
123	-	lara	sakit	gerah
124	-	larang	awis	-
125	-	lenga	lisah	-
126	-	lima	gangsal	-
127	-	liya	sanes	-
128	-	loro	kalih	-
129	-	lunga	kesah	tindak
130	-	luput	lepat	-
131	-	luwih	langkung	-
132	-	maju	majeng	-
133	-	mangan	nedha	dhahar
134	-	manuk	peksi	-
135	-	mati	pejah/tilar donya	seda
136	-	mau	kalawau	-
137	-	mengko	mangke	-
138	-	mula	mila	-
139	-	mung	namung	-
140	-	nek	menawi	-
141	-	nulis	nyerat	-
142	-	obah	ewah	-
143	-	ora	boten	-
144	-	padha	sami	-
145	-	pari	pantun	-
146	-	pethuk	papag	-
147	-	pitik	ayam	-
148	-	pira	pinten	-
149	-	rada	radi	-
150	-	rasa	raos	-
151	-	rusak	risak	-
152	-	saka	saking	-
153	-	salah	lepat	-
154	-	sapa	sinten	-
155	-	sapi	lembu	-
156	-	sedulur	sedherek	-
157	-	sedhela	sekedhap	-
158	-	sing	ingkang	-
159	-	siji	setunggal	-
160	-	sikil	-	samparan
161	-	sore	sonten	-
162	-	suwe	dangu	-
163	-	takon	-	nyuwun pirsa/mundhut pirsa
164	-	tali	tangsul	-
165	-	thukul	tuwuh	-
166	-	tiba	dhawah	-
167	-	tilik	tuwi	-
168	-	tuku	tumbas	mundhut
169	-	turah	tirah	-
170	-	turu	tilem	sare
171	-	tuwa	sepuh	-
172	-	uga	ugi	-
173	-	ula	sawer	-
174	-	untu	-	waja
175	-	waca	waos	-
176	-	wadon	estri	putri
177	-	wani	wantun	-
178	-	wareg	tuwuk	-
179	-	wedi	ajrih	-
180	-	weteng	-	padharan
181	-	wis	sampun	-
182	-	wisuh	-	wijik
183	-	wong	tiyang	-
184	-	yen	menawi	-

7.      Latihan

Tindakna omong-omongan manut katrangan ing ngisor iki!

a.       Suwardi karo Suwarna iku kanca akrab. Nalika ing sekolahe ana clasmeeting, dheweke malah omong-omongan neng kelas. Sing diomongake bab preinan semester.

b.      Pak Raharja karo Pak Subagya iku padha dene durung kenal. Ing sawijining dina ketemu ing acara mantenan, banjur omong-omongan. Sing diomongake saka kenalan nganti nakokake daleme sarta papan pagaweane.

c.       Pak Darna karo Pak Mitra iku kanca akrab nanging isih padha dene njaga srawunge (padha dene ngajeni). Kekarone nalika ketemu padha ngrembug bab kasenengane bocah saiki.

d.      Ing sawijining dina Pak Harja lan Pak Karta, tangga cedhak sing ora pati akrab ketemu. Kekarone duwe hobi ngingu manuk. Pak Harja genti genten nyritakake manuk sing dadi ingon-ingone.

 

Uji Kompetensi

A.     Titik-titik ing ngisor ganepana nganggo tembung kang mathuk!

1.      Ragam basa Jawa iku kang baku yaiku...lan...

2.      Ragam ngoko dibedakake dadi .... lan ....

3.      Tembung panandha basa ngoko alus yaiku....

4.      Tembung panandha basa krama alus yaiku....

5.      Basa ngoko lugu iku digunakake kanggo guneman marang....

6.      Murid marang guru iku yen matur sing bener nganggo basa....

7.      Putra kang wis rumaket marang wong tuwane yen matur bisa nganggo basa....

8.      Guneman marang wong kang kalungguhane luwih dhuwur iku sing bener nggango basa....

9.      Kanca karo kanca wis akrab nanging isih padha dene ngajeni yen guneman sing bener nganggo basa....

10.  Tembung netral yaiku....

B.     Teks guneman iki paragkna lan terusna kanthi nggatekake konteks!

1.      Erna lan Fitri sekolah ing SMP C. Dheweke akrab banget sebab kajaba omahe cedhak, uga kekancan wiwit SD. Nalika bubar pelajaran olahraga, bocah loro iku ngobrol ngomongake pelajaran sing lagi wae rampung.

Erna     : “Piye, Fit, nek manut kowe olahraga dina iki?”

Fitri      : “Sip. Beda karo biyasane.”

Erna     : “....”

Fitri      : “Lha biyasane aku angger servise ora tau entuk biji apik.  Iki mau malah

   entuk biji  sanga.”

            Erna     : “Lha resepe apa kok isa ngono?”

            Fitri      : “....”

            Erna     : “O... dadi kowe neng ngomah saben sore melu latihan voly ta?”

            Erna     : “Iya.”

2.      Ing wektu sore kira-kira jam 4, Bu Sinta nyapu ing dalan ngarep daleme. Ora let suwe ana priyayi (Bu Titik)  nyuwun pirsa daleme  Pak Marjuki. Bu Sinta uga banjur nuduhake.

Bu Titik            : “....”

Bu Sinta           : “Pak Marjuki ingkang dados guru napa dhokter?
Bu Titik            : “....”

Bu Sinta           : “O...Pak Marjuki guru. Menika ngajeng menika rak wonten mobil

    abrit ta?     Lha  dalemipun Pak Marjuki wingking mobil menika.”

            Bu Titik            : “Kinten-kinten wonten dalem boten nggih, Bu?”

            Bu Sinta           : “...”

3.      Rahmad bocah kelas 1 SMP. Bocahe akrab banget marang bapakne. Ing sawijining dina, Rahmad matur  yen kepengin tilik embahe ing desa.

Rahmad            : “Pak, kapan tilik simbah neng desa?”

Bapak              : “Ya sesuk nek Bapak wis sela ta ya.”

Rahmad            : “...”

Bapak              : “Suk tanggal 12 rak prei ta? Tanggal kuwi kowe takterke.”

Rahmad            : “...”

Bapak              : “Simbahmu ora papa.”

Rahmad            : “...”

Bapak              : “Ya mesthi tindak ta Ibumu. Coba kowe mengko matura Ibumu.”

Rahmad            : “...”

4.      Esuk kuwi Bagus piket kelas mula tekane ing sekolah gasik. Bagus ngira  yen dheweke teka paling gasik. Jebul tekan sekolah, Pak Widi wis rawuh. Pirsa Bagus teka gasik, banjur didangu.

Pak Widi          : “Kok dingaren gasik temen, Gus?”

Bagus               : “...”

Pak Widi          : “Lha sapa wae kancamu piket?”

Bagus               : “...”   

Pak Widi          : “Kok ora disapu bubar pelajaran wingi, ngapa?”

Bagus               : “...”

Pak Widi          : “Lho ketoke bubar pelajaran wingi udane wis terang ta?”

Bagus               : “...”

Pak Widi          : “Ya wis kana diresiki kelase.”

5.      Ing wayah esuk, sadurunge pelajaran,  Eni karo Retna ngomongake kedadeyan dhek wingi. Eni takon marang Retna sing nyebabake didukani gurune.

Eni       : “Ret, kowe wingi salah apa ta marang Pak Muji, kok Pak Muji duka kuwi?”

Retna   : “...”

Eni       : “O... dadi kowe ninggalke kelas ra matur ta?”

Retna   : “...”

Eni       : “Lho iku rak durung jame Pak Muji no.”

Retna   : “...”

Eni       : “Nek aku, nek ijin mesthi nunggu guru sing keri kok.”

Retna   : “Lha piye ta En, wis ora kuwat ngampet kok.”

Eni       : “Ya muga-muga suk ora kedadean maneh.’

Glosarium

status                            : keadaan atau kedudukan

hobi                              : kesenangan

tembung                       : kata

tembung netral  : kata yang tidak memiliki imbangan ngoko, krama, atau krama

  inggil                          

tembung ngoko : kata yang memiliki imbangan kata krama/krama inggil atau

  kedua-duanya

basa ngoko lugu            : ragam bahasa Jawa yang memiliki kosakata penanda netral

  dan ngoko

basa ngoko alus            : ragam bahasa Jawa yang memiliki kosakata penanda netral,

   ngoko, dan krama

basa krama lugu            : ragam bahasa Jawa yang memiliki kosakata penanda netral

  dan krama

basa krama alus            : ragam bahasa Jawa yang memiliki kosakata penanda netral,

  krama, dan krama inggil

Daftar Pustaka

Ekowardono, B. Karno. Dkk. 1993. Kaidah Penggunaan Ragam Krama Bahasa Jawa. Jakarta: Pusat Pembinaan dan Pengembangan Bahasa Departemen Pendidikan dan Kebudayaan

Iskandar, Ki Ali. 2011. Pepak Basa Jawa. Aswaja Presindo. Yogyakarta

Sasangka, Sri Satriya Tjatur Wisnu. 2004. Unggah-ungguh Bahasa Jawa. Jakarta: Yayasan Paramalingua

Suliyanto, 2008. Bebakalan Sinau Basa Jawa. Sukoharjo – Surakarta: Cendrawasih

Read More