Dadi Bocah Aja Nganti Bubrah

Dadi Bocah Aja Nganti Bubrah

        Jaman saiki kondhang diarani jaman global. Jan-jane apa jaman global iku? Jaman global iku jaman sing sarwa cepet. Lelungan cepet, sesambungan (komunikasi) cepet. Prasasat arep weruh papan liya ora kudu marani papan sing dituju, nanging mung cukup mijet/mencet remot wis neng ngarepe papan sing dituju. Bab kaya ngono iku uga lumaku kanggo kadadean-kedadean liyane. Kedadeyan kanggo sapa wae, kalebu kanggo bocah enom.

        Bocah enom (bocah sekolah) dituturi wong tuwa nalika ing  ngomah lan  diwulang guru nalika ing sekolah. Ing rong panggonan iku (omah lan sekolah) bocah dipesen supaya gladhen tumindak apik lan ngedohi sing ala. Pesen iku ora mung mandheg ing kono, nanging isih ditambahi kanggo sangu ngadhepi urip ing tembe buri.

         Ning yakuwi, ing jaman global iki, niyate wis kuwat arep nyinau sing apik lan adoh saka bab-bab sing ala. Embuh saka ngendi sangkane, piye carane dumadakan sing ora dikarepake liwat ing ngarepe. Conto sing paling cetha, nalika arep golek bahan kanggo ngrampungke tugas kanthi nyuwun pirsa "Mbah Google" ndadak njedhul setan sing digawe kedhep-kedhep sing ora jelas maksude. Kanggo apa, kanggo sapa, lan saka sapa, ora jelas juntrunge. Sing jelas yen sing ditawakake mau "dijawil", nek basane internet "diclik" mesthi njedhul "setan-setan gentayangan".

        Sing kaya ngono kuwi kanggo sing wis tuwa utawa nalare cukup ora dadi prekara, nanging kanggo bacah sekolah utawa bocah enom, sing isih gemludhug atine, mesthi bakal gawe perkara. Perkara iku bisa mandheg ing bocah dhewe, uga bisa perkara kanggo wong liya. Terus kudu kepriye?

         Raden Ngabehi Ranggawarsita, pujangga kondhang saka kraton Surakarta nyerat ing Serat Kalatidha kaya ing ngisor iki.

            "Amenangi jaman edan,

              ewuh aya ing pambudi,

              melu edan ora tahan,

              kalamun tan anglakoni,

             boya keduman melik,

              kaliren wekasanipun,

              ndilalah kersa Allah,

              begja-begjane kang lali,

              isih begja kang eling lan waspada."

Cakepan tembang iku nek dicethakake, meruhi  jaman edan (jaman global?) iki gawe bingung ing ati. Olehe bingung iku amarga yen melu edan bakal ora tahan (pikirane ora kuwat), nanging yen ora melu edan ora bakal entuk bageyan. Nek ora ing urip iki ora entuk bageyan (rejeki) mesthi wae bakal kaliren tegese ora bisa mangan amarga ora ana sing dipangan. Kanggo ngadhepi kahanan sing kaya mangkono iku ana piwulang luhur sing kudu diugemi/digatekake. Piwulang luhur iku ngandhakake menawa saka karsane Gusti Allah sabeja-bejane wong sing lali, isih beja wong sing eling lan waspada. Eling tegese tansah eling marang Sing Gawe Urip. Kanthi eling marang Gusti Allah mesthi wae ora bakal tumindak ala. Sing nomer 2, wong iku kudu waspada, tegese kudu kebak pangati-ati ing bab apa wae. Kanthi ngati-ati mesthi kaslametan sing bakal ditemokake.

            Apa sambunge karo bocah sekolah? Bocah sing sekolah iku calon pemimpin ing tembe mburi mula kudu ngati-ati sakabehane. Aja mung merga nuruti karep terus lali yen besuk kuwi ana tanggung jawab sing gedhe sing kudu diadhepi. Apa kuwi? Nanggung dhiri pribadine, nanggung kulawargane, lan nanggung jejeg lan majune negara iki. 

            Carane? Tunggu candhake....

Read More

Wangsalan ing Tembang

Wangsalan tinulis ing tembang

Dening Ki Anom Sawukir

1. Dhandhanggula

Lemek sikil tuku mbayar mburi,

Ndlesep-ndlesep tangane andhuwa

Reca kayu, golekane

Kenya weteng lemu

Kang pindundhut kang dentresnani

Rambut utih lirira

Yekti tujwanipun

Angupaya kadangira

Beras mateng rasa asin king jaladri

Kanca kuliyahira

2. Pocung

Wadhah buku salam kanggo yen mertamu

Tuntas aranira

Yen luput nuwun aksami

Warga kacang sranane kanggo kekancan

3. Gambuh

Bubar Jumat puniku

Tumindaka kang becik satuhu

Anak bebek  anak sapi anak pitik

Rikat cepet gathukipun

Tinampa ing sadhengah wong

Read More

Bawa Yen Ing Tawang Ana Lintang

Yen tawang ana lintang

Cah ayu aku ngenteni

Marang mega ing angkasa

Sun takon wartanireki

Janji-janji  ku eling

Sumedhot rasa tyas ingsun

Nimas aku prasapa

Sineksenan bumi langit

Tangising tyas, ngenteni padhang rembulan.

Read More

Pancen Nyata

PANCEN NYATA

Syair: Sawukir

Pancen nyata wis kondhang wis kaloka

Es Em Pe Telu Loro aneng Semarang

Dadi papan nggulawenthah para siswa

Dimen pinter lan ngerti ing tata krama

Kaya kang wis tinulis ana ing visi

Tekun menuntut ilmu  unggul  prestasi

Berbudi pekerti luhur iku dadi

Srana anggembleng para putra lan putri

E..e..e  ya o ya e

Lulusane akeh kang nyambut gawe

Ana kana apa ana ing kene

Kabeh bisa padha  nggayuh tujuane

E e e ya o ya e

Ayo bareng angudi ngarumake

Kuncarane es em pe telu loro

Dimen dadi es em pe ingkang juwara

Kapan maneh, yen ora saka saiki

Bebarengan anggayuh sarta nggoleki

Kasuwure esempe telu loro

Mrih piguna mring nusa bangsa lan nagri

Read More

Geguritan Minggu Esuk

Jangkah  langkah satitah
ngambah lemah tilas sawah
hawa seger bareng angin kumliwer
agawe laku kang ora banter

tutuk crita mripat saba
endi pucuk endi bongkot
angel tinemu

mung rasa ayem
guyub
rukun
kang rinasa bareng karo pangampingku

Minggu esuk iki ana rasa kang beda
karo esuke dina liya
ngangsa, kemrungsung, goreh
ilang ing esuk iki
bareng karo jangkah langkah
ing lemah tilas sawah
sing saiki wis ora thukul pari
ning wujud gedhung omah kang edi peni

                                 Klipang, 25 Oktober 15 esuk

Read More

Nama Gamelan Jawa

Nama-nama instrumen gamelan Jawa.

1.    Rebab

a.     Rebab Plonthang

b.    Rebab Byur ( Kresna )

c.     Rebab Baladewa

2.    Gender

a.     Gender Barung

b.    Gender Penerus

3.    Bonang

a.     Bonang Barung

b.    Bonang Penerus

4.    Slenthem

5.    Demung

a.     Demung 1

b.    Demung 2

6.    Saron

a.     Saron barung 

b.    Saron Penerus ( Peking)

7.    Kendhang

a.     Kendhang Besar ( Bem )

b.    Kendhang Sabet

c.     Kendhang Ciblon

d.    Kendhang ketipung

8.    Kenong

9.     Kethuk

10.   Kempyang

11.  Kempul

12.  Gong 

a.     Gong Besar (Ageng )

b.    Gong Kecil ( Suwukan ) Nada 2

c.     Gong Kecil ( Suwukan ) Nada 3

13.  Suling

14.  Siter

15.  Clempung

16.  Gambang

17.  Kemanak

18.  Kecer

19.  Bedhug

Read More

Pidato Berbahasa Jawa 1

Pidhato Nampi Toya Siraman

Assalamu’alaikum  wr. Wb.

Alhamdulillah …..

Bapak…, duta saraya saking Bapak…ingkang satuhu pantes sinambrama ing pakurmatan

Puji  syukur konjuk  dhumateng Allah SWT, ingkang sampun maringi pinten-pinten kanugrahan mliginipun ingkang arupi iman lan kabagaswaran setemah panjenengan lan kula saged kempal ing papan menika kanthi wilujeng. Sholawat  saha salam konjuk Nabi Agung Muhammad SAW, ingkang tansah kita tengga pitulunganipun mbenjang ing dinten kiyamat.

Keparengna kula ngadeg ing ngarsa panjenengan. Ing ngriki  kula matur minangka sulihipun kadang kula  Bapa… saperlu nanggapi pangandikanipun Bapa….

      Wondene ingkang perlu kula aturaken:

Sepisan, Bapa…  ngaturaken sugeng rawuh awit saking rawuh panjenengan.

Kaping kalih, salam taklim saking Bapa… kula tampi, mangke tumuli badhe kula aturaken dhateng

                         Bapa…

Kaping tiga,  pasrah panjenengan ingkang arupi toya siraman calon penganten kakung  minangka sarat sarana ngicali sesuker kula tampi kanthi gumbiraning manah, mugi-mugi sedaya pangajab binerkahan dening Allah.

Kaping sekawan,   Menawi wonten dhanganing penggalih, sasampunipun toya siraman kula tampi, kersaa panjenengan angestreni lumampahing siraman tumrap calon penganten kakung.

Mekaten ingkang saged kula aturaken, awit  kirang trep  atur saha anggen kula mranata dhiri, kula nyuwun pangapunten. Nuwun.

Wassalamu’alaikum wr. wb.

     Pidhato Nampi Pangandikan ing Adicara Midadareni

Assalamu’alaikum  wr. Wb.

Alhamdulillah …..

Para sepuh  lan pinisepuh ingkang kula bekteni.

Bapak Ibu, para lenggah ingkang kula urmati.

Puji  syukur konjuk  dhumateng Allah SWT, ingkang sampun maringi pinten-pinten kanugrahan mliginipun ingkang arupi iman lan kabagaswaran setemah panjenengan lan kula saged kempal ing papan menika kanthi wilujeng. Sholawat  saha salam konjuk Nabi Agung Muhammad SAW, ingkang tansah kita tengga pitulunganipun mbenjang ing dinten kiyamat.

Keparengna kula ngadeg ing ngarsa panjenengan. Ing ngriki  kula matur minangka sulihipun kadang kula  Bapa… saperlu nanggapi pangandikanipun Bapa….

      Wondene ingkang perlu kula aturaken:

Sepisan, Bapa…  ngaturaken sugeng rawuh awit saking rawuh panjenengan.

Kaping kalih, salam taklim saking Bapa… kula tampi, mangke tumuli badhe kula aturaken dhateng

                         Bapa…

Kaping tiga,  kula ngaturaken agunging panuwun awit panjenengan sampun kersa rawuh anganthi calon penganten kakung. Kanthi lumaraping calon penganten kakung ing dalu menika ndadosaken manteping  penggalih Bapa… anggenipun badhe ngijababaken putra putrinipun ingkang asesilih….

Ing wasana kasuwun bapa …dalah para pangombyong calon penganten kakung lumebet ing sasana midadareni saperlu nyekecakaken lelenggahan ngantos purnaning adicara.

Mekaten ingkang saged kula aturaken, awit sedayabkalepatan anggen kula matur,  kula nyuwun pangapunten. Nuwun.

Wassalamu’alaikum wr. wb.

Pidhato Nampi Pasrah

Assalamu’alaikum  wr. Wb.

Alhamdulillah …..

Para sepuh  lan pinisepuh ingkang kula bekteni.

Bapak Ibu, para lenggah ingkang kula urmati.

Puji  syukur konjuk  dhumateng Allah SWT, ingkang sampun maringi pinten-pinten kanugrahan mliginipun ingkang arupi iman lan kabagaswaran setemah panjenengan lan kula saged kempal ing papan menika kanthi wilujeng. Sholawat  saha salam konjuk Nabi Agung Muhammad SAW, ingkang tansah kita tengga pitulunganipun mbenjang ing dinten kiyamat.

Bapak Ibu ingkang kula urmati, keparengna kula ngadeg wonten ing ngarsa panjenengan. Ing ngriki  kula matur minangka sulihipun kadang kula  Bapa… saperlu nanggapi pangandikanipun Bapa….

      Wondene ingkang perlu kula aturaken:

Sepisan, Bapa…  ngaturaken sugeng rawuh awit saking rawuh panjenengan.

Kaping kalih, salam taklim saking Bapa… kula tampi, mangke tumuli badhe kula aturaken dhateng Bapa…

Kaping tiga,  pasrah panjenengan ingkang arupi sanggan minangka sarat sarana jejangkeping

                        palakrama kula tampi kanthi suka gumbiraning manah, mugi-mugi sedaya pangajab

                         binerkahan dening Allah.

Kaping sekawan,   kasuwun kulawarga Bapa… lan para pangombyong nyekecakaken lenggah ing

                         papan ingkang sampun cumawis.

Mekaten ingkang saged kula aturaken, nglenggana awit kathah kalepatan anggen kula matur, kula nyuwun pangapunten. Nuwun.

Wassalamu’alaikum wr. wb.

Read More